Lapin akan rohki hyvä rohtovinkki, juhannusruusu

Juhannusruusu

Rosa spinosissima, Rosa pimpinellifolia

On se niin sulonen. Niin valkonen, puhas ja viaton. Sen oksat aivanko tanssivat aurinkoa kohen ja somat nuput kurkottavat valhoon. Juhannusruusu hoitaa meän mieltä.

Ko ihmisellä on apea olo, auttaa ko kattoo jotaki kaunista. Niin son, usko pois. Aina ko on paha mieli ja jotensakki jurppii, tekkee hyvvää mennä ulos ja hengittää, kävellä vähä, marssia syämenlyöntien tahthiin jonku hienon äähreen.

Ihmisen mieli on semmonen värkki, että sitä häätyy hoitaa. Jos oikhein pitkhään ja pahasti pännii, saattaa saaha jonku tauvin. Vitutuksheen voipi vaikka kuolla.

Luonnonkauhneus son hyvä hoitaja. Juhannusruusu on tehokas, mutta kyllä kaikki muukki kauhniit asiat luonnossa passaavat, jos ruusu ei justhiin satu kukkihmaan.

Juhannusruusutaika: mene kukkivan juhannusruusun tykö ja kattele kukkia tarkhaan, miten kauhniisti valo kimmeltää terälehtien läpi. Haistele hienoa haijua, oikhein syvhään veä henkeä. Älä mieti mithään, vain kattele ja hengitä.

Jopa vain sulla kohta onki parempi mieli.

Juhannusruusun terälehilä koristelhaan salaatit ja kakut. Kukat voipi kuivata teeaihneeksi tai muuhun ruuanlaithoon. Yks hauska konsti on tehhä ruususta sokerihuurretut somistheet. Elikkä ruusun terälehet upotethaan munanvalkuaisvaahthoon ja sitte kieritelhään sokerissa. Lopuksi kuivathaan uunissa 40 astheen lämmössä uuninluukku raolhaan. Valhmiit koristheet säilytethään lasipurkissa.

Ruusuvesi on soma ja helppo tehhä.

Kiehautethaan litra vettä, kuuhmaan vetheen laitethaan viis kourallista ruusun terälehtiä ja nostethaan keitos levyltä hautuhmaan puoleksi tunniksi. Sitte siivilöihään ja pullotethaan vesi. Se säilyy viileässä kolmisen päivää.

Ruusuvettä voipi pirskotella naamale ja laittaa hautheina silmäluomile. Jopa tulleeki hehkeät tuntheet ja kirkhaat silmät, eikä sinua kukhaan pysty vastustahmaan.

Tai ruusuveen voipi käyttää ruuanlaithoon. Ruusurisotto, eikö kuullostakki maukhaalta?

Juhannusruusun kiulukat saattaa syyä. Hyviä non aivan semmosenhaanki, muuta voipi net kuivatakki. Peshään kiulukat, halkasthaan ja kuivathaan. Kiulukoista saapi teetä tai net käytethään ruuanlaitossa ja leipomisessa. Tai tehhään hilloa. Miten vain haluthaan.

On se monikäyttönen ja komea kasvi. Onneksi se kasvaa meilä Lapissaki.

Meilä on muitaki ruusuja. Torniojokilaakson ruusu on kans ihana.

Niin son, että kaikki on ihanaa, mikä Torniojokilaaksossa kasvaa.